Fast craft sa Roble shipping napiling galleon
CEBU, Philippines — Simple apan elegante ang konsepto sa dekorasyon sa galleon nga sakyan sa imahen ni Senior Santo Niño karong Sabado sa tinuig nga fluvial procession.
Si Elvina Roble,46, kinsa maoy mangulo sa pagbutang og dekorasyon sa galleon nipadayag nga iyang konsepto mao nga mura og maglutaw ang galleon ug adornohan ang palibot niini sa mga presko nga buwak nga adunay kolor nga yellow, pula ug puti.
Si Elvina asawa ni Jay Roble ug kanhi Hermana ug Hermano Mayor sa tuig 2014 nibutyag nga dali na para niya ang pagbutang og dekorasyon tungod kay tinuig na usab kini niya nga pagabuhaton isip usa ka deboto kang Santo Niño.
Si Jose Emery Roble, presidente ug CEO sa Roble Shipping Lines Inc. nagkanayon nga nasurpresa ug nalipay sila dihang ilahang nahibaw-an nga sila ang official carrier sa imahen karong tuiga diin ilaha kining gipangandoy ug giampo.
Ang bag-ong gi-refurbish nga fast craft nga M/V Super Joy nga adunay rota nga Cebu-Hilongos ug Cebu-Baybay ug adunay 240 ka seating capacity maoy opisyal nga galleon nga sakyan sa imahen sa balaang bata sa fluvial procession.
Ang M/V Super Joy ang labing unang commercial vessel nga gigamit isip galleon nga nagsugod niadtong 1988 ug hangtud karon ang pagsalmot sa banay’ng Roble sa tinuig nga kalihukan.
Dugang ni Jose nga adunay lima nga magsunod nga maoy mo-control isip honor guard vessel sa galleon.
source: https://www.philstar.com/banat/balita/2019/01/15/1885128/fast-craft-sa-roble-shipping-napiling-galleon-davide-nipahimangno
